Perezida Kagame yazamuye mu ntera abofisiye 632

Perezida wa Repubulika y’u Rwanda akaba n’Umugaba w’Ikirenga w’Ingabo z’u Rwanda (RDF), Paul Kagame, yazamuye mu ntera abofisiye 632 bavuye ku ipeti rya Sous-Lieutenant bajya ku rya Lieutenant.

Mu itangazo Ibiro by’Ingabo z’u Rwanda (RDF) byasohoye kuri uyu wa 4 Ukwakira 2025, ryemeje ko izo mpinduka zihita zitangira gukurikizwa.

Iri tangazo ryagize riti “Perezida wa Repubulika akaba n’Umugaba w’Ikirenga w’Ingabo z’u Rwanda, yazamuye mu ntera abofisiye 632, bavuye ku ipeti rya Sous-Lieutenant bajya ku rya Lieutenant. Izo mpinduka zirahita zitangira gukurikizwa,”.

Izi mpinduka zije zikurikira umuhango wabaye ku wa 3 Ukwakira 2025 wo guha ipeti rya Sous-Lieutenant abofisiye bato 1,029 barangije amasomo mu Ishuri Rikuru rya Gisirikare rya Gako, mu Karere ka Bugesera.

Muri uwo muhango, Perezida Kagame yashimye umuhate n’ubwitange abo basirikare bagaragaje mu masomo, anabasaba gufata inshingano zabo zo kurinda igihugu n’abagituye babishyizeho umutima. Abibutsa ko umutekano n’amahoro ari wo musingi w’iterambere igihugu cyubakiyeho.

Yagize ati “Inshingano zanyu ni ukurinda u Rwanda n’Abanyarwanda neza. Mugomba gusobanukirwa neza izo nshingano, mugaharanira ko igihugu gikomeza kubaho gitekanye kandi kitavogerwa n’abatakifuriza ibyiza. Dushaka amahoro.”

Perezida Kagame yanabibukije ko nyuma y’imyaka 31 igihugu kibohowe,u Rwanda rugikomeje kubaka amahoro n’umutekano binyuze mu bufatanye bw’abaturage bose.

Yongeye ko “Ahazaza h’u Rwanda hari mu biganza byanyu, mu maboko yanyu. Ubushobozi mufite bugaragara muzabukoreshe uko bikwiye, tubatezeho byinshi ariko mujye muhera no kwitwara neza, mwifate neza, murinde ubuzima bwanyu, mugire n’uruhare ku bireba abanyu.”

By Twagirayezu Patrick