Paul Biya yatorewe manda nshya, iba iya munani yikurikiranya ayobora Cameroon
Perezida Paul Biya yongeye gutorerwa kuyobora Cameroon ku myaka 92 y’amavuko, akomeza kuba Umukuru w’Igihugu ukuze kurusha abandi ku Isi, nyuma y’aho Akanama gashinzwe kurengera Itegeko Nshinga, kemeje ko yatsinze ku majwi 53,66%.
Ku manywa yo kuri uyu wa 27 Ukwakira 2025, nibwo amajwi yatangajwe n’Akanama gashinzwe kurengera Itegeko Nshinga muri Cameroon ko Biya ari we watsinze amatora n’amajwi 53.7%, mu gihe umukandida waruhanganye na we cyane, Issa Tchiroma Bakary, yabonye amajwi 35.2%. Ibi byemeza ko Biya, umaze imyaka irenga 40 ku butegetsi, agiye gukomeza kuyobora Cameroon nk’umukuru w’igihugu.
Bakary yari yitangarije ko ari we watsinze amatora mbere y’uko ibyavuye mu matora bitangazwa, avuga ko ibyatangajwe n’Akanama gashinzwe kurengera Itegeko Nshinga byuzuyemo uburiganya.
Nyuma y’ibi, byatangajwe ko mu mujyi wa Garoua, hafi y’urugo rwa Bakary, humvikanye urusaku rw’amasasu, aho abantu babarirwa muri bane bapfiriye mu mirwano ikomeye nyuma yo kumva ibyavuye mu matora.
Mu mujyi wa Douala, umurwa w’ubucuruzi, habaye imvururu zikomeye hagati y’abashyigikiye abatavuga rumwe n’ubutegetsi n’inzego z’umutekano, bituma ibikorwa byinshi bihagarara. Mu murwa mukuru Yaoundé, amaduka n’amashuri menshi byafunzwe kubera ubwoba bw’uko hashobora kuba imyigaragambyo ikomeye.
Mu 1982 nibwo Paul Biya yageze ku butegetsi, bivuze ko manda ye nshya y’imyaka irindwi ishobora kumugeza ku myaka 50 ayobora Cameroon. Nibigeraho, mu 2032 ubwo iyo manda izaba irangiye, azaba ageze hafi ku myaka 100 y’amavuko.
By Twagirayezu Patrick
