Abanyamakuru bane baguye mu gitero Israel yagabye ku bitaro byo muri Gaza
Abanyamakuru bane n’abandi bantu 11 bishwe mu gitero Israel yagabye ku bitaro bya Nasser, biherereye mu mujyi wa Khan Younis mu majyepfo ya Gaza.
Ibiro bishinzwe itangazamakuru muri Gaza byatangaje ko abo banyamakuru ari Hossam Al-Masri, Mohammed Salama, Mariam Abu Daqa na Moaz Abu Taha. Bose bapfuye ubwo barimo gutara inkuru ku bitaro byari byibasiwe n’ibisasu.
Iri tangazo ryemeje ko umubare w’abanyamakuru bamaze kwicwa kuva intambara yatangira wiyongereye, ugera kuri 244.
Byavuze ko aba banyamakuru bishwe ubwo bari mu kazi kabo, baganira n’abaturage ubwo igisasu cyagwaga hafi yabo.
Iki gitero gikurikiye ikindi cyagabwe ku wa 10 Kanama 2025, hafi y’Ibitaro bya Al-Shifa, cyahitanye abandi banyamakuru batanu bakoreraga Al Jazeera. Muri bo harimo Anas al-Sharif w’imyaka 28, wari uzwi cyane mu kugaragaza amakuru y’akarengane muri Gaza.
Yari kumwe na Mohammed Qreiqeh ndetse n’abafata amashusho batatu: Ibrahim Zaher, Mohammed Noufal na Moamen Aliwa. Muri icyo gitero, abantu barindwi bahasize ubuzima.
Ku ruhande rwa Israel yavuze ko aba banyamakuru bakekwagaho gukorana n’umutwe wa Hamas, ari nawo Israel irwana nawo muri Gaza, ndetse yemeza ko igamije kuwurandura burundu.
Iyi mibare igaragaza uburyo intambara ya Gaza ikomeje kugira ingaruka zikomeye ku banyamakuru n’abaturage basanzwe, by’umwihariko mu bice byegeranye n’ibigo nderabuzima n’ahari ibikorwa by’ubutabazi.
By Twagirayezu Patrick
