EAC yungutse asaga miliyoni 800 $ mu gihembwe cya mbere cya 2025

Umuryango wa Afurika y’Iburasirazuba (EAC) watangaje ko mu gihembwe cya mbere cya 2025 wungutse asaga miliyoni 800 z’amadolari ya Amerika, nyuma y’izamuka ry’ubucuruzi bwo kohereza ibicuruzwa hanze byiyongereyeho 47.3%. Ibi bibaye nyuma y’igihombo cya miliyari 4 z’amadolari wabonye mu gihe nk’icyo mu 2024.

EAC ivuga ko iri zamuka ryaturutse ku mikorere myiza y’ibyoherezwa mu mahanga, ubucuruzi hagati y’ibihugu bya Afurika no kongera ubushobozi bwo guhangana ku isoko mpuzamahanga.

Iyi raporo igaragaza ko ibyoherezwa hanze byazamutseho 48.1% bigera kuri miliyari 17.7$, mu gihe ibyinjijwe byiyongereyeho 4.6% bigera kuri miliyari 16.8 $. Ubucuruzi hagati y’ibihugu bya Afurika bwazamutseho 53.9%, aho bwagize uruhare rwa 27.5% mu bucuruzi bwose bwa EAC. Ibyoherezwa hagati y’ibihugu bigize EAC ubwabyo byazamutseho 53.6% bigera kuri miliyari 5.2$.

U Bushinwa bwakomeje kuyobora ibindi bihugu mu kugirana na EAC ubucuruzi buri hejuru, bukurikirwa na UAE, Ubuhinde, Afurika y’Epfo n’Ubuyapani. EAC yagaragaje ko mu mateka yayo, ubucuruzi bwayo n’u Bushinwa bwazamuye inyungu ya miliyari 1.8$. Ibicuruzwa byinshi byoherejwe harimo amabuye y’agaciro, ibikomoka ku buhinzi n’imashini, bigize 50% by’agaciro k’ubucuruzi bwose hamwe.

Ku bijyanye n’izamuka ry’ibiciro, umwaka wa 2024 waranzwe n’impuzandengo ya 13.5%, ivuye kuri 6.3% mu 2023. Iri zamuka ryatewe cyane n’izamuka ry’ibiciro muri Sudani y’Epfo rigana na99.9% n’Uburundi n’izamuka rya 20.8%. Igipimo cy’ibiciro kitabariwemo ibiribwa n’ingufu cyari kuri 28.9%, mu gihe ibiciro ku biribwa byari kuri 49.4%, naho ibijyanye n’amazi n’amashanyarazi byari kuri 3.3%.

Mu by’imari, amafaranga ari mu maboko y’abaturage yiyongereyeho 10.1% muri icyo gihembwe, bigaterwa n’izamuka rya 21.1% ry’inguzanyo ya Leta. Inguzanyo yagiye mu rwego rw’abikorera nayo yazamutseho 5.5%. Umutungo wa EAC uri mu mahanga wiyongereyeho 18.1%, bitewe n’amafaranga yoherejwe n’abatuye hanze.

Inguzanyo zashyizwe mu buhinzi zazamutseho 6.6%, iz’ubwubatsi 17.5%, izo mu miturire 4.8% naho iz’ubucuruzi bunini n’ubuciriritse zazamutseho 9.6%. Urwego rw’inganda rwabonye izamuka rito cyane aho rifite 0.5%. Urwego rw’ingo ni rwo rukomeje kuba urufite imyenda myinshi na miliyari 13.8$, rukurikirwa n’ubucuruzi bunini n’ubuciriritse miliyari 7.9$.